لارڈز: ایشز سیریز کے دوسرے ٹیسٹ میچ میں آسٹریلیا نے سنسنی خیز مقابلے کے بعد انگلینڈ کو 43 رنز سے شکست دیکر سیریز میں 0-2 کی برتری حاصل کرلی۔
لارڈز میں کھیلے گئے میچ میں آسٹریلیا کے 371 رنز کے تعاقب میں انگلینڈ کی پوری ٹیم 327 رنز پر ڈھیر ہوگئی، بین اسٹوکس اور بین ڈکٹ کے علاوہ انگلینڈ کے تمام بلے باز بڑی اننگز کھیلنے میں ناکام رہے۔
انگلش ٹیم کے کپتان آل راؤنڈر بین اسٹوکس نے وکٹ کے چاروں اطراف جارحانہ شارٹس کھیلتے ہوئے حریف باؤلرز کو بے بس کیے رکھا، انہوں نے 9 چھکوں اور 9 چوکوں کی مدد سے 155 رنز کی شاندار اننگز کھیلی لیکن اسکے باوجود وہ ٹیم کو فتح سے ہمکنار نہ کراسکے جبکہ بین ڈکٹ 83 رنز بناکر آؤٹ ہوئے۔
آخری روز ایک دلچسپ مرحلہ دیکھنے کو ملا جب جونی بیرسٹو ڈرامائی انداز میں رن آؤٹ ہوئے اس دوران اسٹیڈیم میں امپائر کے فیصلے کے خلاف بھرپور صدائیں بلند کی گئیں۔
لارڈز ٹیسٹ کی پہلی اننگز میں آسٹریلیا نے 427 رنز اسکور کیے تھے جس کے جواب میں انگلش ٹیم 325 رنز بنا سکی تھی جبکہ دوسری اننگز میں کینگروز 279 رنز پر آؤٹ گئے تھے اور حریف ٹیم کو 371 رنز کا ہدف دیا تھا، عثمان خواجہ 77 رنز بنا کر سرفہرست رہے تھے، میچ کے دوران بہترین کارکردگی دکھانے پر اسٹیو اسمتھ کو مین آف دی میچ کا ایوارڈ دیا گیا۔
The post ایشز سیریز کے دوسرے ٹیسٹ میں بھی آسٹریلیا نے انگلینڈ کو شکست دے دی appeared first on ایکسپریس اردو.
شکریہ ایکسپریس اردو » کھیل