کراچی: سندھ ہائیکورٹ نے پاکستان سپرلیگ 2020 کے میچ فکسنگ سے متعلق منی لانڈرنگ اورٹیررفائنانسگ کیس میں مرکزی ملزم سمیت 6 ملزمان کی ضمانتیں مسترد کردیں۔
جسٹس کے کے آغا کی سربراہی میں دو رکنی بینچ نے پاکستان سپر لیگ 2020 کے میچ فکسنگ سے متعلق پی ایس ایل میں منی لانڈرنگ اور ٹیرر فائنانسنگ کیس میں ملزمان کی درخواست ضمانت پر فیصلہ سنا دیا۔ فیصلہ عبد المالک گدی اور جسٹس مسز راشدہ اسد پر مشتمل دو رکنی بینچ نے محفوظ کیا تھا۔
عدالت نے فیصلہ سناتے ہوئے مرکزی ملزم سمیت 6 ملزمان کی ضمانتیں مسترد کردیں۔ ملزمان میں محمد فیصل عرف چٹا، مہندر کمار، فیصل غلام حیسن، محمد سجاد، ناریش کماراوراحمد ارمغان حنیف شامل ہیں۔ تمام ملزمان پہلے ہی جیل میں ہیں۔ عدالت نے ملزمان کی جانب سے بینکنگ کورٹ میں زیرسماعت مقدمہ ختم کرنے کی درخواست بھی مسترد کردی۔ بین الاقوامی گروہ سے تعلق رکھنے والے بکیوں کیخلاف مقدمہ درج ہے۔
تفتیشی افسرنے بین الاقوامی بکی گروہ سے تعلق رکھنے والے ملزم فیصل چٹا کو کلین چٹ دی تھی۔ ایف آئی اے تفتیشی افسر کے بدلتے موقف پرعدالت نے اظہار برہمی کیا تھا۔ پی ایس ایل 2020 میں بکیوں نے معروف کرکٹرسے بھی رابطہ کیا تھا۔ دبئی اور بین الاقوامی بکیوں کے گروہ نے پاکستان کی بدنامی کا پلان بنایا تھا۔ ایف آئی اے نے ملزمان کے قبضے سے موبائل فونز اوراہم شواہد حاصل کیے تھے۔
The post پی ایس ایل؛ میچ فکسنگ سے متعلق کیس میں ملزمان کی ضمانتیں مسترد appeared first on ایکسپریس اردو.
شکریہ ایکسپریس اردو » کھیل