واشنگٹن: امریکا میں ایک معمار 3 منزلہ گھر کے باتھ روم کی نئے سرے سے تعمیر کررہا تھا جب اسے باتھ ٹب کی عقبی دیوار میں رکھا خوفناک ہتھیار ملا۔
میڈیا رپورٹس کے مطابق امریکی دارالحکومت واشنگٹن میں ازسرنو تعمیرات کا کام کرنے والے ایک معمار گھر سے باتھ ٹب منتقل کررہے تھے جب انہوں نے دیوار کے اندر خفیہ طور پر رکھا گیا دستی بم دریافت کیا۔
پولر بیئر کنسٹرکشن کمپنی کے مالک وادیم خرکاوی نے مقامی میڈیا سے گفتگو کرتے ہوئے بتایا کہ جب انہوں نے واشنگٹن میں ایک گھر کی تیسری منزل کے باتھ روم کا ٹب ہٹایا تو دیوار میں ایک خفیہ خانہ تھا اور اس میں ایک دستی بم رکھا ہوا تھا۔
انہوں نے کہا کہ جب میں نے یہ دیکھا تو میرا پہلا خیال وہاں سے بھاگ جانے کا تھا۔ تاہم انہوں نے دستی بم کی ویڈیو ریکارڈ کی اور اسے اپنی کمپنی کے سوشل میڈیا پیج پر پوسٹ کیا۔
وادیم نے بتایا کہ پہلے پہل وہ وہاں سے دور ہوگئے، لمبی سانسیں لیں اور واپس باتھ روم میں جا کر ویڈیو ریکارڈ کی۔ ان کا کہنا تھا کہ میں نے اپنے فون سے زوم کیا اور گرینیڈ کی ویڈیوز لیں۔ سیئٹل پولیس ڈیپارٹمنٹ بم اسکواڈ کو فوراً واقعے کی اطلاع دی گئی جس پر اہلکار جائے وقوعہ پر پہنچے۔ انہوں نے تصدیق کی کہ یہ دستی بم اصلی ہے لیکن یہ غیر فعال ہوچکا ہے۔
The post باتھ روم کی ازسرنو تعمیر کے دوران دیوار میں خفیہ خانے سے بم برآمد appeared first on ایکسپریس اردو.
شکریہ ایکسپریس اردو » دلچسپ و عجیب